Royal Group​​​ កំពុងពន្លឿនតភ្ជាប់ខ្សែបញ្ជូនថាមពលក្រោមបាតសមុទ្រទៅកាន់កោះរ៉ុង

• Sommana Yan
• 3 ខែ​កុម្ភៈ 2023
• ព័ត៌មានក្នុងស្រុក
• 168 មើល

ក្រុមហ៊ុន រ៉ូយ៉ាល់ គ្រុប កោះរ៉ុង ឌីវេឡុបមេន ខមភេនី ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Royal Group បានវិនិយោគ តភ្ជាប់ខ្សែកាប្លិ៍ក្រោមបាតសមុទ្រ ពីដីគោក ទៅកាន់កោះរ៉ុង ដែលក្រុមហ៊ុនកំពុងវិនិយោគជាច្រើនកន្លែង រួមមានសណ្ឋាគារលំដាប់ផ្កាយ និងអាកាសយានដ្ឋានផងដែរ។​

ខ្សែកាប្លិ៍ក្រោមបាតសមុទ្រ ចាប់ផ្តើមសាងសង់​ នៅខែកញ្ញា ឆ្នាំ២០២២ ដែលមានប្រវែងប្រមាន៦០គីឡូម៉ែត្រ ដែលជាការសហការវិនិយោគរួមគ្នា​រវាងក្រុមហ៊ុនជាមួយអគ្គិសនីកម្ពុជា។​

អ្នកឧកញ៉ា​ គិត​ ម៉េង អគ្គនាយកក្រុមហ៊ុន រ៉ូយ៉ាល់ គ្រុប បានមានប្រសាសន៍ថា៖ “ខ្សែបញ្ជូនប្រវែងប្រមាណ ៦០គីឡូម៉ែត្រ ត្រូវបានសាងសង់នៅលើកោះរ៉ុង គ្រោងនឹងបញ្ចប់នៅក្នុងត្រីមាសទី១ នៃឆ្នាំ២០២៣នេះ ដើម្បីអាចមានអគ្គិសនីចែកចាយនៅបុណ្យចូលឆ្នាំខ្មែរខាងមុខ”។

ក្រុមហ៊ុន រ៉ូយ៉ាល់ គ្រុប បាន​ចុះ​កិច្ចព្រមព្រៀង​ជួល​កោះរ៉ុង​មាន​ទីតាំង​នៅ​ខេត្ត​ព្រះសីហនុ​ជាមួយ CDC ដែល​តំណាងឱ្យ​រដ្ឋាភិបាល​កាលពី​ថ្ងៃទី​ ២៨ ខែ​ កុម្ភៈ ឆ្នាំ​ ២០០៨ ដើម្បី​អភិវឌ្ឍ​ជា​តំបន់​អភិវឌ្ឍន៍​ពាណិជ្ជកម្ម និង​រមណីយដ្ឋាន​ទេសចរណ៍​។ នេះ​បើ​យោងតាម​ព័ត៌មាន​បាន​ពី​ក្រុមហ៊ុន រ៉ូយ៉ាល់​គ្រុប​។

បច្ចុប្បន្ន ក្រុមហ៊ុន​បានសាងសង់សណ្ឋាគារលំដាប់ផ្កាយ៣ និងផ្កាយ៥ ក្រោមទុនវិនិយោគសរុប ៥៥លានដុល្លារ។

ក្រុមហ៊ុន ក៏កំពុងស្ថាបនាផ្លូវបេតុងអាមេប្រវែង៧០គីឡូមែត្រ ចំណាយទុនវិនិយោគ៣៥លានដុល្លារ ដោយបច្ចុប្បន្ន សម្រេចការសាងសង់បាន ៥០ភាគរយ។​  (អានបន្ថែម)

ថ្មីៗនេះ ក្រុមហ៊ុន បានចាប់ផ្តើមសាងសង់អាកាសយានដ្ឋានអន្តរជាតិ លំដាប់ 4C នៅលើកោះរ៉ុង​ ដោយគ្រោងនឹងបញ្ចប់ការសាងសង់នៅក្នុងរយៈពេល៥ឆ្នាំ។ (អានបន្ថែម)

• Projects Development