ត្រឹម ៣ខែ ឆ្នាំ២០២៦៖ មានកុងតឺន័រឆ្លងកាត់កំពង់ផែស្វយ័តភ្នំពេញជាង១៦ម៉ឺន TEUs កើនជិត ៣៤%

Proeksa Meas
29 ខែមេសា 2026
ព័ត៌មានអចលនទ្រព្យ
649 មើល

ក្នុងត្រីមាសទី១ ឆ្នាំនេះ ពោលគឺ៣ខែដើមឆ្នាំ២០២៦ មានបរិមាណកុងតឺន័រឆ្លងកាត់កំពង់ផែស្វយ័តភ្នំពេញ មានចំនួន ១៦២ ២៤២ TEUs កើនចំនួន ៣៣,៦១% ធៀបនឹង ៣ ខែដើមឆ្នាំ២០២៥។

សកម្មភាពពាណិជ្ជកម្មរឹងមាំ និងការកើនឡើងនៃផលិតកម្មក្នុងស្រុកជំរុញឱ្យមានការកើនឡើងគួរឱ្យកត់សម្គាល់ក្នុងការដឹកជញ្ជូនតាមផ្លូវទឹក និងប្រាក់ចំណូលសម្រាប់កំពង់ផែទន្លេដែលគ្រប់គ្រងដោយរដ្ឋ។

នេះបើយោងតាមសេចក្តីប្រកាសព័ត៌មានអំពីលទ្ធផលការងារអាជីវកម្ម សេវាកម្ម អនុវត្តសម្រាប់ខែមីនា និងអនុវត្ត៣ខែដើមឆ្នាំ២០២៦ (ពុំទាន់ធ្វើសវនកម្ម) ដែលផ្សាយចេញនៅថ្ងៃទី ២០ ខែមេសា ឆ្នាំ២០២៦។

ក្នុងរបាយការណ៍ របស់ ក.ស.ត. បង្ហាញទៀតថា ក្នុងត្រីមាសទី១នេះ បរិមាណទំនិញ-ប្រេងឥន្ធនៈឆ្លងកាត់កំពង់ផែស្វយ័តភ្នំពេញ មានចំនួន ១.៤៦៨.៦៣៨ តោន កើនឡើង១៣,៣៥% និងបរិមាណកុងតឺន័រឆ្លងកាត់មានចំនួន ១៦២.២៤២ ធីអ៊ីយូ កើន ៣៣,៦១%។ ដោយឡែក បរិមាណនាវាចូលចតសរុបចំនួន ១០០១ គ្រឿង កើន ១១,៥៩% ខណៈដែលបរិមាណនាវាដឹកអ្នកដំណើរចូលមានចំនួន ១៥៣ គ្រឿង កើន ៨,៥២% និងចំនួនអ្នកដំណើរឆ្លងកាត់សរុបចំនួន ១៥.៨៨៦នាក់ កើន ២,៣៣%។

សូមរំឭកដែរថា នៅក្នុងឆ្នាំ២០២៥ កន្លងទៅនេះ ប្រតិបត្តិការអាជីវកម្មរបស់កំពង់ផែស្វយ័តភ្នំពេញ(PPAP) បានបង្ហាញសញ្ញាវិជ្ជមានគួរឱ្យកត់សម្គាល់ ដោយមានកុងតឺន័រឆ្លងកាត់ប្រមាណជាង ៦០ម៉ឺនធីអ៊ីយូ(TEU) កើនឡើងជិត ២៥% បើធៀបនឹងឆ្នាំ២០២៤។ ដោយឡែកសម្រាប់នាវាដឹកអ្នកដំណើរ គឺមានចំនួន ៤១៣ គ្រឿង កើនឡើង ៥,៩% និងអ្នកដំណើរឆ្លងកាត់ចំនួន ៣៩.៨០៤ នាក់ កើនឡើង ១០,១១%។ (អានបន្ថែម)

- Video Advertisement -