ទំនិញរបស់កម្ពុជា បាននាំចេញទៅកាន់ទីផ្សារ ១៧៧ប្រទេស កើនជិត ៣៥ពាន់លានដុល្លារ

Proeksa Meas
5 ខែតុលា 2026
ព័ត៌មានអចលនទ្រព្យ
42 មើល

ការនាំចេញទំនិញរបស់កម្ពុជា ត្រូវបានពង្រីកនាំចេញទៅប្រទេសចំនួន១៧៧ ពោលគឺមានទំហំទឹកប្រាក់កើនឡើងរហូតជិត ៣៥ពាន់លានដុល្លារអាមេរិក។នេះបើយោងតាមរបាយការណ៍ ស្តីពីកិច្ចប្រជុំគណៈរដ្ឋមន្ត្រីដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលថ្ងៃទី២៥ ខែកញ្ញា ឆ្នាំ២០២៦។

របាយការណ៍ដដែលបានបង្ហាញថា ទំនិញរបស់កម្ពុជា ត្រូវបានពង្រីកទៅកាន់ទីផ្សារពិភពលោកកើនដល់ចំនួន១៧៧ប្រទេសហើយ។ ជាមួយគ្នានេះ ការនាំចេញរបស់កម្ពុជាទៅកាន់ទីផ្សារពិភពលោក ក្នុងអាណត្តិរាជរដ្ឋាភិបាល នីតិកាលទី៧ នៃរដ្ឋសភា មានកំណើនជាលំដាប់ពី ២២ ៥៣២ លានដុល្លារអាម៉េរិក ទៅ ២៥ ៧៣៩ លានដុល្លារអាម៉េរិក ស្មើនឹង ១៤,២៣% ទៅ ២៩ ៦១៧ លានដុល្លារអាម៉េរិក ស្មើនឹង ១៥,០៧% និងថ្មីៗនេះ បានកើនឡើងរហូតដល់ ៣៤ ៩៦០ លានដុល្លារអាម៉េរិក ស្មើនឹង ១៨,០៤% ទោះបីជាក្នុងបរិបទពិភពលោក និងតំបន់ កំពុងប្រែប្រួលដ៏ស្មុគស្មាញ ភាពតានតឹង ភូមិសាស្ត្រនយោបាយ សង្គ្រាមនៅតាមតំបន់នានា ការប្រែប្រួលនៃសណ្តាប់ធ្នាប់សេដ្ឋកិច្ចពិភពលោក វិបត្តិថាមពល ការបន្ទច់បង្អាក់ខ្សែច្រវាក់ផ្គត់ផ្គង់ និងការប្រែប្រួលអាកាសធាតុក៏ដោយ។

រដ្ឋាភិបាលបង្ហាញថា ការនាំចេញទៅទីផ្សារដៃគូសំខាន់ៗខាងលើនេះ បានជួយបង្កើនតម្លៃបន្ថែមលើ ផលិតផលកសិកម្ម និងការពង្រីកឧស្សាហកម្មគាំទ្រក្នុងស្រុក តាមរយៈការទាញយកអត្ថប្រយោជន៍ជាអតិបរមាពី កិច្ចព្រមព្រៀងពាណិជ្ជកម្ម ដែលជាកាតាលីករដ៏សំខាន់ក្នុងការកាត់បន្ថយគម្លាតជញ្ជីងពាណិជ្ជកម្ម និងជំរុញកំណើនសេដ្ឋកិច្ចប្រកបដោយចីរភាព។

ជាមួយគ្នានេះ រដ្ឋាភិបាល បាននិងកំពុងបន្តជំរុញពិពិធកម្មទីផ្សារ លើកកម្ពស់សមត្ថភាពកែច្នៃ ក្នុងស្រុក និងពង្រឹងខ្សែច្រវាក់តម្លៃកសិ-ចំណីអាហារជាតិ ក្រសួងពាណិជ្ជកម្មបាននិងកំពុងបោះជំហានយ៉ាងស្វាហាប់ជាមួយយុទ្ធនាការផលិតផលផលិតនៅកម្ពុជា (Made In Cambodia) ដើម្បីជំរុញការនាំចេញផលិតផលកសិ-កែច្នៃ បន្តឈានចូលទីផ្សារកម្រិតខ្ពស់ និងផ្សារទំនើបខ្នាតយក្សលំដាប់ពិភពលោក៕ (អានបន្ថែម)

- Video Advertisement -