សហរដ្ឋអាមេរិកបើកទំព័រយុទ្ធសាស្ត្រថ្មីក្នុងតំបន់អាស៊ីអាគ្នេយ៍តាមរយៈកញ្ចប់វិនិយោគនិងសន្តិសុខរាប់ពាន់លានដុល្លារ
ដំណើរទស្សនកិច្ចរបស់រដ្ឋមន្ត្រីការបរទេស Marco Rubio នៅទីក្រុងម៉ានីល បង្ហាញពីមហិច្ឆតារបស់ក្រុងវ៉ាស៊ីនតោនក្នុងការប្រកួតប្រជែងភូមិសាស្ត្រនយោបាយ និងការជួយជ្រោមជ្រែងសេដ្ឋកិច្ចតំបន់ឥណ្ឌូប៉ាស៊ីហ្វិក
ទីក្រុងម៉ានីល៖ នៅក្នុងបរិបទនៃការប្រកួតប្រជែងអំណាចយ៉ាងស្រួចស្រាវក្នុងតំបន់អាស៊ីអាគ្នេយ៍ សហរដ្ឋអាមេរិកបានប្រកាសពីជំហានយុទ្ធសាស្ត្រដ៏ធំមួយដើម្បីពង្រឹងវត្តមាន និងឥទ្ធិពលរបស់ខ្លួននៅក្នុងតំបន់ឥណ្ឌូប៉ាស៊ីហ្វិក។ ក្នុងឱកាសនៃដំណើរទស្សនកិច្ចផ្លូវការរបស់រដ្ឋមន្ត្រីការបរទេសអាមេរិក លោក Marco Rubio នៅទីក្រុងម៉ានីល ប្រទេសហ្វីលីពីន ចាប់ពីថ្ងៃទី២១ ដល់ថ្ងៃទី២៣ ខែកក្កដា ឆ្នាំ២០២៦ ដើម្បីជួបពិភាក្សាជាមួយថ្នាក់ដឹកនាំអាស៊ាន និងដៃគូក្នុងតំបន់ ក្រុងវ៉ាស៊ីនតោនបានប្រកាសដាក់ចេញនូវកញ្ចប់ថវិកាវិនិយោគ និងជំនួយដែលមានតម្លៃសរុបជាង ២,៥ ប៊ីលានដុល្លារអាម៉េរិក។ ការបោះទុនដ៏មហិមានេះមានគោលដៅជំរុញកិច្ចសហប្រតិបត្តិការសន្តិសុខ ការកសាងហេដ្ឋារចនាសម្ព័ន្ធយុទ្ធសាស្ត្រ បច្ចេកវិទ្យា និងថាមពល ដើម្បីប្រកួតប្រជែងជាមួយឥទ្ធិពលដែលកំពុងកើនឡើងរបស់ចិននៅក្នុងតំបន់។
ដើម្បីធានាបាននូវឧត្តមភាពផ្នែកបច្ចេកវិទ្យា និងថាមពលក្នុងតំបន់ សហរដ្ឋអាមេរិកបានចាប់ផ្តើមគំនិតផ្ដួចផ្ដើម AI SPARK ក្រោមក្របខ័ណ្ឌ Pax Silica ដើម្បីផ្ទេរបច្ចេកវិទ្យា និងគាំទ្រការនាំចេញបច្ចេកវិទ្យាបញ្ញាសិប្បនិម្មិតអាមេរិកមកកាន់អាស៊ីអាគ្នេយ៍ ព្រមទាំងផ្តល់ថវិកា ១០លានដុល្លារ សម្រាប់ពង្រឹងហេដ្ឋារចនាសម្ព័ន្ធបច្ចេកវិទ្យាព័ត៌មាន និងសារគមនាគមន៍ក្នុងប្រទេសហ្វីលីពីន។ លើសពីនេះ អាមេរិកបានផ្តល់ជំនួយប្រមាណ ៦០ លានដុល្លារ តាមរយៈអង្គភាព MCC ដល់ហ្វីលីពីនសម្រាប់វិស័យថាមពល និងបានកៀរគរថវិកា ១៧លានដុល្លារសម្រាប់ដៃគូរ៉ែសំខាន់ៗក្នុងតំបន់ទន្លេមេគង្គ។ តាមរយៈកិច្ចព្រមព្រៀងថាមពលជប៉ុន-អាមេរិក-មេគង្គ (JUMPP) ថវិកា ៥ លានដុល្លារ ត្រូវបានបែងចែកសម្រាប់អភិវឌ្ឍន៍ទីផ្សារអគ្គិសនី និងបណ្តាញថាមពលនៅកម្ពុជា ឡាវ ថៃ និងវៀតណាម រួមជាមួយថវិកា ៤លានដុល្លារ សម្រាប់គាំទ្រគម្រោងរ៉ែសំខាន់ៗក្នុងប្រទេសហ្វីលីពីន។
ចំណុចលេចធ្លោមួយទៀតនៃយុទ្ធសាស្ត្រនេះ គឺការវិនិយោគលើហេដ្ឋារចនាសម្ព័ន្ធ និងទំនាក់ទំនងពាណិជ្ជកម្ម ដោយស្ថាប័ន DFC របស់អាមេរិកបានបង្កើតវេទិកាវិនិយោគថាមពលតម្លៃ ១,៥ ប៊ីលានដុល្លារ ដែលជាគម្រោងវិនិយោគធំបំផុតក្នុងប្រវត្តិសាស្ត្ររបស់ខ្លួន។ ជាមួយគ្នានេះ អាមេរិកគ្រោងផ្តល់ជំនួយជាង ១០០ លានដុល្លារ សម្រាប់អភិវឌ្ឍន៍ហេដ្ឋារចនាសម្ព័ន្ធនៅតំបន់ស៊ូប៊ិកបេ (Subic Bay) ក្នុងច្រករបៀងសេដ្ឋកិច្ចលូសុន ដោយរាប់បញ្ចូលទាំងការធ្វើទំនើបកម្មកំពង់ផែ និងបញ្ជររក្សាទុកប្រេងឥន្ធនៈដែលមានចំណុះជាង ១២០ លានលីត្រ។ ទំនាក់ទំនងផ្នែកពាណិជ្ជកម្មរវាងក្រុមហ៊ុនអាមេរិក និងតំបន់អាស៊ានសម្រេចបានទំហំកិច្ចព្រមព្រៀងជាង ១៤ ប៊ីលានដុល្លារក្នុងឆ្នាំកន្លងទៅ ក្នុងនោះរួមមានទាំងបំណងរបស់ក្រុមហ៊ុនអាកាសចរណ៍ Philippine Airlines ក្នុងការទិញយន្តហោះ Boeing 787 រហូតដល់ ២០ គ្រឿងដែលបំពាក់ដោយម៉ាស៊ីន GE Aerospace GEnx ផងដែរ។
នៅក្នុងវិស័យសន្តិសុខ និងច្បាប់ សហរដ្ឋអាមេរិកបានបង្កើនថវិកាជំនួយយោធា FMF ដល់ហ្វីលីពីនចំនួន ១០០លានដុល្លារ សម្រាប់ឆ្នាំ២០២៦ ដែលជាការកើនឡើងចំនួន ៦០ លានដុល្លារធៀបនឹងកម្រិតប្រវត្តិសាស្ត្រ ព្រមទាំងផ្តល់ថវិកា ២១,៤៥ លានដុល្លារសម្រាប់កម្មវិធីសិក្សា និងការហ្វឹកហ្វឺនយោធា IMET ដោយក្នុងនោះរួមមានការចាប់ផ្តើមកម្មវិធីឡើងវិញនៅកម្ពុជា និងបង្កើតថ្មីនៅព្រុយណេ។ បន្ថែមលើនេះ អាមេរិកបានផ្តល់ថវិកា ៩ លានដុល្លារសម្រាប់ពង្រីកផែឆ្មាំសមុទ្រហ្វីលីពីននៅកោះប៉ាឡាវ៉ាន់ ថវិកា ១៩ លានដុល្លារសម្រាប់ការប្រឆាំងភេរវកម្ម ថវិកា ៦,៥ លានដុល្លារសម្រាប់ប្រព័ន្ធ Rhombus AI Concierge និងថវិកា ៣ លានដុល្លារសម្រាប់ការហ្វឹកហ្វឺនសុវត្ថិភាពស៊ីប័រ។ ក្រៅពីជំនួយប្រឆាំងបទល្មើសឆ្លងដែន ២,៥ លានដុល្លារ និងកិច្ចព្រមព្រៀងសុខាភិបាលតម្លៃ ៦៨៥ លានដុល្លារជាមួយហ្វីលីពីន អាមេរិកក៏បានបន្តផ្តល់ថវិកាជាង ១៣០ លានដុល្លារសម្រាប់ការបោសសំអាតគ្រាប់មីន និងយុទ្ធភណ្ឌមិនទាន់ផ្ទុះនៅក្នុងប្រទេសកម្ពុជា ឡាវ និងវៀតណាមផងដែរ។
ការដាក់ចេញនូវកញ្ចប់វិនិយោគ និងជំនួយដ៏ទូលំទូលាយរបស់សហរដ្ឋអាមេរិកនាពេលនេះ បានបង្ហាញឱ្យឃើញយ៉ាងច្បាស់ពីការប្តេជ្ញាចិត្តរបស់ក្រុងវ៉ាស៊ីនតោន ក្នុងការរក្សាតុល្យភាពអំណាច និងបង្កើនភាពប្រកួតប្រជែងនៅក្នុងតំបន់អាស៊ីអាគ្នេយ៍។ តាមរយៈការរួមបញ្ចូលគ្នារវាងកិច្ចសហប្រតិបត្តិការសន្តិសុខ ការផ្ទេរបច្ចេកវិទ្យា និងការអភិវឌ្ឍហេដ្ឋារចនាសម្ព័ន្ធ សហរដ្ឋអាមេរិកមិនត្រឹមតែពង្រឹងសម្ព័ន្ធភាពរបស់ខ្លួនជាមួយហ្វីលីពីន និងអាស៊ានប៉ុណ្ណោះទេ ប៉ុន្តែថែមទាំងបានផ្តល់នូវជម្រើសយុទ្ធសាស្ត្រដ៏សំខាន់មួយសម្រាប់បណ្តាប្រទេសក្នុងតំបន់ ដើម្បីធានាបាននូវសន្តិសុខ បទដ្ឋានច្បាប់អន្តរជាតិ និងការអភិវឌ្ឍសេដ្ឋកិច្ចប្រកបដោយចីរភាព។
- Video Advertisement -
English 
ខ្មែរ 
