អាម៉េរិកជាម្ចាស់ជំនួយលើសកម្មភាពដោះមីននៅកម្ពុជាធំជាងគេ រហូតជាង ២០០លានដុល្លារ

Proeksa Meas
21 ខែមីនា 2026
ព័ត៌មានអចលនទ្រព្យ
453 មើល

ជំនួយជាង 200 លានដុល្លាររបស់អាម៉េរិកក្នុងរយៈពេលបីទសវត្សរ៍មកនេះ បានសង្គ្រោះជីវិតមនុស្ស និងស្តារដីធ្លីឡើងវិញសម្រាប់សហគមន៍នានាទូទាំងប្រទេស

អាម៉េរិកបានរួមចំណែកអស់រយៈពេលជាង៣០ឆ្នាំ និងជាម្ចាស់ជំនួយធំជាងគេរហូតដល់ជាង ២០០លានដុល្លារ សម្រាប់ប្រតិបត្តិការជាតិស៊ីម៉ាក់ក្នុងកិច្ចការសកម្មភាពបោសសម្អាតមីនមនុស្សធម៌ជួយសង្គ្រោះអាយុជីវិត។

នេះបើយោងតាមប្រសាសន៍របស់ឯកឧត្តម លី ធុជ អនុប្រធានទី១ អាជ្ញាធរមីន ថ្លែងក្នុងកិច្ចពិភាក្សាជាមួយ លោក Ethan Rinks នាយកកម្មវិធីនៃការិយាល័យកាត់បន្ថយនិងរំសាយសព្វាវុធនៃក្រសួងការបរទេសសហរដ្ឋអាម៉េរិក និងគណៈប្រតិភូ កាលថ្ងៃទី១២ ខែមីនា ឆ្នាំ២០២៦។

នាឱកាសនោះ ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណជូនចំពោះរដ្ឋាភិបាល និងប្រជាជននៃសហរដ្ឋអាមេរិក ដែលជួយគាំទ្រដល់ការបោសសម្អាតមីនតាមព្រំដែន និងឧបត្ថម្ភគាំទ្រដល់ជនភៀសសឹក ផងដែរ។ ឯកឧត្តម ក៏បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា រួមជាមួយប្រទេសជាមិត្ត និងដៃគូអភិវឌ្ឍន៍ ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាម និងកិច្ចសង្រ្គោះជនរងគ្រោះដោយសារមីននៅកម្ពុជា ក្នុងនោះសហរដ្ឋអាមេរិក គឺជាប្រទេសម្ចាស់ជំនួយធំជាងគេរហូតដល់ជាង ២០០លានដុល្លារអាម៉េរិក។

ឯកឧត្តម លី ធុជ បានទទួលស្គាល់ចំពោះការរួមចំណែករបស់សហរដ្ឋអាមេរិក អស់រយៈពេលជាង ៣០ឆ្នាំ ពិតជាបានជួយសង្រ្គោះអាយុជីវិត និងផ្តល់ដីប្រកបដោយសុវត្ថិភាពជូនដល់ប្រជាជនកម្ពុជាបានយ៉ាងច្រើនតាមរយៈវិស័យសកម្មភាពមនុស្សធម៌នេះ។ ឯកឧត្តម បានចាត់ទុកភាពជាដៃគូ និងការបន្តកិច្ចសហប្រតិបត្តិការរបស់សហរដ្ឋអាម៉េរិក នឹងមានសារៈសំខាន់ក្នុងការដោះស្រាយបញ្ហាប្រឈមដែលនៅសេសសល់ គាំទ្រសហគមន៍ដែលរងផលប៉ះពាល់ និងសម្រេចបាននូវគោលដៅរួមនៃប្រទេសកម្ពុជាដែលមានសុវត្ថិភាព និងគ្មានមីន។

សូមរំឭកថា រយៈពេល៣៣ឆ្នាំកន្លងមកនេះ គិតចាប់ពីឆ្នាំ១៩៩២ ដល់ឆ្នាំ២០២៥ ផ្ទៃដីកម្ពុជាទំហំ ៣ ៥៤១ គីឡូម៉ែត្រការ៉េ ត្រូវបានបោសសម្អាតសម្រាប់យកទៅប្រើប្រាស់ និងបង្កបង្កើនផល។ នេះបើយោងតាមសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលថ្ងៃទី២៣ ខែកុម្ភៈ ឆ្នាំ២០២៦៕ (អានបន្ថែម)

- Video Advertisement -