កម្ពុជាទទួលបានគម្រោងថ្មីចំនួន១២ មានទុន $១៥៥លាន បន្ថែមក្នុងវិស័យឧស្សាហកម្ម និងថាមពល

• Sommana Yan
• 2 ខែ​មិថុនា 2025
• ព័ត៌មានក្នុងស្រុក
• 112 មើល

ដើម្បីជំរុញនិងលើកកម្ពស់ទិដ្ឋភាពសេដ្ឋរបស់ខ្លួន ក្រុមប្រឹក្សាអភិវឌ្ឍន៍កម្ពុជា បាននិងកំពុងពិនិត្យពិភាក្សាលើគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន១២គម្រោង ដែលមានទុនវិនិយោគសរុប ១៥៥លានដុល្លារ បន្ថែមចូលក្នុងវិស័យឧស្សាហកម្ម និងហេដ្ឋារចនាសម្ព័ន្ធ។

នេះបើតាមកិច្ចប្រជុំចេញចូលតែមួយដឹកនាំដោយឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅថ្ងៃទី៣០ ខែឧសភា ឆ្នាំ២០២៥។

គម្រោងទាំងនេះមិនត្រឹមតែត្រូវបានរំពឹងថានឹងជួួយជំរុញកំណើនសេដ្ឋកិច្ចប៉ុណ្ណោះទេ ប៉ុន្តែក៏នឹងជួួយបង្កើតការងារបានប្រមាណ ៧,៥ពាន់កន្លែង សម្រាប់ប្រជាពលរដ្ឋក្នុងតំបន់ផងដែរ។

គួរបញ្ជាក់ថា មុខសញ្ញាវិនិយោគក្នុងវិស័យឧស្សាហកម្មចំនួន ១១គម្រោង (រោងចក្រកែច្នៃលោហធាតុ, ផលិតក្រដាសកាតុង, ផលិតផលិតផលពិធីបុណ្យនានា-សម្លៀកបំពាក់បុណ្យ Halloween តុក្កតា ទៀន និងសម្ភារៈបន្ទាប់បន្សំ, ផលិតសម្ភារៈសត្វចិញ្ចឹម និងសម្ភារៈក្មេងលេង, ផលិតកម្រាលជ័រ និងបន្ទះក្តារ, ផលិតថ្នាំលាប និងទឹកថ្នាំ (ពីសារធាតុគីមី), ផលិតអំពូលភ្លើង សម្ភារៈលម្អក្នុងផ្ទះ និងគ្រឿងបន្ទាប់បន្សំអគ្គិសនីគ្រប់ប្រភេទ, ផលិតកង្ហារគ្រប់ប្រភេទ និងគ្រឿងបន្ទាប់បន្សំអេទ្បិចត្រូនិកគ្រប់ប្រភេទ, ផលិតគ្រឿងសង្ហារិម, ផលិត និងផ្គុំដំទ្បើងកង្ហារ និងផលិតតុក្កតាគ្រប់ប្រភេទ) និងវិស័យហេដ្ឋារចនាសម្ព័ន្ធចំនួន១គម្រោង (អភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យអានុភាព១០០មេហ្កាវ៉ាត់ ខេត្តបាត់ដំបង)។

គម្រោងវិនិយោគទាំង១២ខាងលើនេះ គ្រោងនឹងបោះទីតាំងនៅរាជធានីភ្នំពេញ ខេត្តកណ្តាល ខេត្តតាកែវ ខេត្តកំពង់ស្ពឺ ខេត្តព្រះសីហនុ ខេត្តប៉ៃលិន និងខេត្តបាត់ដំបង ដើម្បីជំរុញការអភិវឌ្ឍន៍ក្នុងតំបន់ និងលើកកម្ពស់កំណើនសេដ្ឋកិច្ចប្រកបដោយតុល្យភាពនៅទូទាំងប្រទេសកម្ពុជា។

នៅពេលដែលរដ្ឋាភិបាលបន្តទាក់ទាញការវិនិយោគពីបរទេស គំនិតផ្តួចផ្តើមទាំងនេះបញ្ជាក់ពីការប្តេជ្ញាចិត្តរបស់កម្ពុជាក្នុងការលើកកម្ពស់សមត្ថភាពឧស្សាហកម្ម និងឯករាជ្យភាពថាមពលរបស់ខ្លួន ដោយត្រួសត្រាយផ្លូវសម្រាប់អនាគតដ៏រុងរឿង។

• Projects Development