ក្រុមហ៊ុន៤ ប្រកាសបង្កើតរោងចក្រតម្លៃជិត ២៥លានដុល្លារ នៅខេត្តកំពង់ស្ពឺ

• Sommana Yan
• 25 ខែ​ឧសភា 2024
• ព័ត៌មានក្នុងស្រុក
• 133 មើល

ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តឲ្យក្រុមហ៊ុនឯកជនចំនួន ៤ វិនិយោគសរុបចំនួន ២៤.៨៥៣.៩១១ ដុល្លារអាមេរិក ក្នុងការសាងសង់រោងចក្រថ្មីចំនួន ៤ នៅខេត្តកំពង់ស្ពឺ។ រោងចក្រ​ទាំងនេះ​ត្រូវ​បាន​គេ​រំពឹង​ថា​នឹង​អាច​បង្កើត​ការងារ​ថ្មី​បាន​ជាង 1,200 ។

ការសម្រេចនេះ ធ្វើឡើងក្នុងកិច្ចប្រជុំ-ច្រកចេញ-ចូលតែមួយ ក្រោមអធិបតីភាព ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅក្រុមប្រឹក្សាអភិវឌ្ឍន៍កម្ពុជា (CDC) និងឯកឧត្តម សុខ ភា អភិបាលរងខេត្តកំពង់ស្ពឺ នៅថ្ងៃទី២៤ ខែឧសភា ឆ្នាំ២០២៤។

គម្រោង​វិនិយោគ​ទាំង​៤​នោះ​រួម​មាន​៖

១. ក្រុមហ៊ុន PARTY A RENEWABLE RESOURCE (CAMBODIA ) CO,. LTD., គ្រោងវិនិយោគបង្កើតរោងចក្រកែច្នៃអាលុយមីញ៉ូម ដោយប្រមូលវត្ថុធាតុដើមចាស់ៗក្នុងស្រុកមកផលិត។

២. ក្រុមហ៊ុន REDLEAF INDUSTRY (CAMBODIA) CO.,LTD., គ្រោងវិនិយោគបង្កើតរោងចក្រផលិតថ្នាំលាបពណ៌គ្រប់ប្រភេទ ម្សៅការពារច្រេះ និងម្សៅបៀក។

៣. ក្រុមហ៊ុន ZENITH LIGHTING (CAMBODIA) CO.,LTD.,

គ្រោងវិនិយោគបង្កើតរោងចក្រផលិតអំពូលគ្រប់ប្រភេទ។

៤. ក្រុមហ៊ុន FLYCAT ELECTRICAL (CAMBODIA) CO.,LTD។

គ្រោងវិនិយោគវិនិយោគបង្កើតរោងចក្រផ្គុំដំឡើងឧបករណ៍បរិក្ខាពេទ្យ (ឧបករណ៍សំអាតមាត់ ធ្មេញ)។

បើ​តាម​លោក សុខ ភា អភិបាលរង​ខេត្ត​បាន​ឲ្យ​ដឹង​ថា គម្រោង​ទាំង​នេះ​នឹង​មានទីតាំងស្ថិត​នៅ​ក្នុង​ស្រុក​សំរោងទង និង​ស្រុក​គងពិសី។

• Projects Development