រដ្ឋាភិបាលថ្មីត្រៀមថវិកា ១០០លានដុល្លារ សម្រាប់ជួយវិស័យកសិកម្ម ជាពិសេសកសាងប្រព័ន្ធធារាសាស្ត្រ

• Sommana Yan
• 29 ខែ​សីហា 2023
• ព័ត៌មានក្នុងស្រុក
• 98 មើល

រាជរដ្ឋាភិបាលកម្ពុជា ត្រៀមកញ្ចប់ថវិកាចំនួន ១០០លានដុល្លារអាមេរិក សម្រាប់ជួយលើកកម្ពស់វិស័យកសិកម្ម​ ជាពិសេសជួយទប់ការធ្លាក់ថ្លៃនៃកសិផល និងកសាងប្រព័ន្ធធារាសាស្ត្រ ជូនប្រជាកសិករកម្ពុជា។ នេះបើតាមការប្រកាស​របស់នាយករដ្ឋមន្ត្រីថ្មី ហ៊ុន ម៉ាណែត ក្នុងពិធីសំណេះ​សំណាលជាមួយកម្មករ កម្មការិនី តាមរោងចក្រ សហគ្រាសចំនួន ១៨.០០០ នាក់ មក​ពី​រោងចក្រ សហគ្រាសចំនួន១៣ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានី​ភ្នំពេញ នាព្រឹកថ្ងៃទី ២៩ ខែសីហា ឆ្នាំ២០២៣។

ឯកឧត្តម ហ៊ុន ម៉ាណែត បានលើកឡើងថា រាជរដ្ឋាភិបាលកម្ពុជា បានត្រៀមថវិកា ១០០លានដុល្លារ ដើម្បី​អន្តរាគមន៍កសិផល ផលិតផលកសិកម្មដូចជាស្រូវ អង្ករ និងបន្លែផ្សេងៗរួចជាស្រេច។

ឯកឧត្តមបានបន្ថែមថា តម្លៃកសិផលមានការឡើងចុះក្នុងឆ្នាំនេះ ប៉ុន្តែនៅពេល​ដែលពលរដ្ឋលំបាករាជរដ្ឋាភិបាលនឹងចូលជួយ ដោយសារតម្លៃកសិផលពឹងផ្អែកលើទីផ្សារពិភពលោក​ ហើយតម្លៃមិនចេះតែឡើងថ្លៃក្នុងពេលជាមួយគ្នានោះដែរ។

ជាមួយនឹងកញ្ចប់ថវិកាដែលត្រៀមនេះ ឯកឧត្តមបានអះអាងថា ការត្រៀមថវិកានេះ ​ដើម្បីជួយទប់នៃការធ្លាក់ថ្លៃកសិផលជូនប្រជាពលរដ្ឋ ហើយនៅពេលកសិផល​ទទួលបាន​ល្អហើយ រាជរដ្ឋាភិបាល ត្រូវរកទីផ្សារជូនពួកគាត់ ដើម្បីទទួលបានចំណូល។

បន្ថែមពីនេះ ឯកឧត្តមហ៊ុន ម៉ាណែត បានបញ្ជាក់ថា «កន្លែងណា​ដែល​លំបាកយើងជួយអន្ត​រា​គមន៍ ដូចជាខ្វះប្រព័ន្ធធារាស្ត្រជាដើម»។

ក្រៅពីនេះ រាជរដ្ឋាភិបាលកម្ពុជា មានគោលនយោបាយដាក់ពង្រាយមន្ត្រីកសិកម្ម នៅ​តាមគ្រប់ភូមិ ឃុំទូទាំងប្រទេស ដែលមានអាទិភាពលើវិស័យកសិកម្មផងដែរ។

• Projects Development
• Agriculture and Aquaculture Project