រដ្ឋាភិបាលប្រកាសបង្កើតកំពង់ផែពហុបំណង និងមណ្ឌលព័ស្តុភារកម្មកំពង់ឆ្នាំងជាផ្លូវការ

Proeksa Meas
26 ខែមីនា 2026
ព័ត៌មានសំណង់
816 មើល

រាជរដ្ឋាភិបាលកម្ពុជាបានប្រកាសបង្កើតកំពង់ផែពហុបំណងនិងមណ្ឌលព័ស្តុភារកម្មកំពង់ឆ្នាំងជាផ្លូវការ ដើម្បីបម្រើឱ្យនាវាដែលធ្វើនាវាចរណ៍ជាលក្ខណៈអន្តរជាតិ ចូលចេញ ផ្ទេរផ្ទុក និងលើកដាក់ទំនិញទូទៅ រួមទាំងកុងតឺន័រនិងទំនិញចាក់ធារ។ នេះបើយោងតាមអនុក្រឹត្យចុះហត្ថលេខាដោយសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា កាលពីថ្ងៃទៅ១៦ ខែមីនា ឆ្នាំ២០២៦។

កំពង់ផែពហុបំណង និងមណ្ឌលព័ស្តុភារកម្មកំពង់ឆ្នាំងនេះ មានទីតាំងស្ថិតនៅ ភូមិចំបក់ខ្ពស់ ឃុំស្វាយរំពារ ស្រុកកំពង់លែង ខេត្តកំពង់ឆ្នាំង។ កំពង់ផែពហុបំណង និងមណ្ឌលព័ស្តុភារកម្មកំពង់ឆ្នាំងមាន២ផ្នែក ជាទ្រព្យសម្បត្តិសាធារណៈរបស់រដ្ឋ និងមួយផ្នែកទៀតជាកម្មសិទ្ធិឯកជន របស់ក្រុមហ៊ុន ខេអិលភី.ធី ត្រេនស្ទ័រថេសិន ឯ.ក។

កំពង់ផែពហុបំណងនិងមណ្ឌលព័ស្តុភារកម្មកំពង់ឆ្នាំង មានសមត្ថភាព ផ្តល់សេវាកម្មសម្រាប់ទំនិញឆ្លងកាត់ប្រមាណ ២ លានតោនក្នុងមួយឆ្នាំ។ កំពង់ផែពហុបំណង និងមណ្ឌលព័ស្តុភារកម្មកំពង់ឆ្នាំង មានជាអាទិ៍ អគារ រដ្ឋបាល អគារត្រួតពិនិត្យទំនិញ អគារស្នាក់នៅ អាហារដ្ឋាន រោងម៉ាស៊ីនភ្លើងនិងរោងជាង ទីលានទំនិញរាយ ទីលានស្តុកកុងតឺន័រ ឃ្លាំងស្តុកទំនិញ ជញ្ជីងថ្លឹងរថយន្ត ហើយទើបរិវេណដីគោកទាំងមូលមានរបងព័ទ្ធជុំវិញ ច្រកចូលចេញ មានបំពាក់ប្រព័ន្ធកាំមេរ៉ាសុវត្ថិភាព បង្គោលភ្លើងបំភ្លឺ និងប្រព័ន្ធវិទ្យុទាក់ទង។

ការអភិវឌ្ឍន៍ដ៏សំខាន់នេះគឺជាផ្នែកមួយនៃផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនពហុមធ្យោបាយ និងភស្តុភាកម្មកម្ពុជា ២០២៣-២០៣៣។ ជាមួយនឹងសមត្ថភាពផ្ទេរផ្ទុកទំនិញប្រមាណ ២ លានតោនក្នុងមួយឆ្នាំ គម្រោងនេះមានគោលដៅជំរុញការដឹកជញ្ជូនតាមផ្លូវទឹក ដើម្បីកាត់បន្ថយថ្លៃដើមដឹកជញ្ជូន និងកាត់បន្ថយការកកស្ទះចរាចរណ៍តាមផ្លូវគោក។ គម្រោងនេះត្រូវបានបែងចែកជាពីរផ្នែក ដោយរួមមានទ្រព្យសម្បត្តិសាធារណៈរបស់រដ្ឋ និងផ្នែកខ្លះជាកម្មសិទ្ធិឯកជនរបស់ក្រុមហ៊ុន ខេអិលភី.ធី ត្រេនស្ទ័រថេសិន ឯ.ក។