រាជធានីភ្នំពេញ មានរោងចក្រសហគ្រាសជាង ៦ពាន់កន្លែង តម្លៃផលិតផលមានជាង ២ពាន់លានដុល្លារ

• Sommana Yan
• 9 ខែ​មីនា 2023
• ព័ត៌មានក្នុងស្រុក
• 92 មើល

រាជធានី ភ្នំពេញ មានរោងចក្រសហគ្រាសចំនួនជាង ៦ពាន់កន្លែង ដែលបានផ្ដល់ការងារដោយផ្ទាល់ដល់កម្មករ និយោជិក បានចំនួនជាង ៥១ម៉ឺនកន្លែង។ រោងចក្រសហគ្រាសទាំងអស់នេះ មានតម្លៃផលិតផលប្រមាណជាង ២ពាន់លានដុល្លារ។

តួលេខនេះ ត្រូវបានប្រកាសឡើងក្នុងពិធីបើកសន្និនិបាតបូកសរុបលទ្ធផលការងារ ឆ្នាំ២០២២ និងលើកទិសដៅការងារ ឆ្នាំ២០២៣ របស់រដ្ឋបាលរាជធានីភ្នំពេញ នៅថ្ងៃទី៩ ខែមីនា ឆ្នាំ២០២៣។

ឯកឧត្តម ឃួង ស្រេង បានមានប្រសាសន៍ថា ការធ្វើអាជីវកម្មកំពុងមានការកើនឡើង នៅរាធធានីភ្នំពេញ ដោយក្នុងនោះរោងចក្រមានចំនួនជាង ៧៦០កន្លែង និងឧស្សាហកម្មធុនតូច និងសិប្បកម្មមានជាង ៥.៤៧៦​ កន្លែង។

ទាក់ទងនឹងគម្រោងសាងសង់វិញ ឯកឧត្តម ឃួង ស្រេង បន្ថែមថា ក្នុងឆ្នាំ២០២២កន្លងទៅ បើទោះបីជាពិភពលោកកំពុងប្រឈមនឹងវិបត្តិជំងកូវីដ-១៩ ការស្នើសុំគម្រោងសាងសង់នៅរាជធានីភ្នំពេញ​ នៅតែបន្ត។​

ក្នុងឆ្នាំ២០២២ សាលារាជធានី បានទទួលការស្នើសុំ ក្នុងការសាងសង់នូវគម្រោងជាង ១,១០០គម្រោង ក្នុងទំហំទុនប្រមាណជាង ៦០៥ លានដុល្លារអាមេរិក ។

• Projects Development