វៀតណាមបោះទុន ២ពាន់លានដុល្លារ សង់រោងចក្រផលិតរថយន្តអគ្គិសនីនៅអាមេរិក

• Sommana Yan
• 31 ខែ​កក្កដា 2023
• ព័ត៌មានអន្តរជាតិ
• 111 មើល

ក្រុមហ៊ុន Vinfast ដែលជាក្រុមហ៊ុនផលិតរថយន្តអគ្គិសនីរបស់វៀតណាម ស្ថិតក្រោមក្រុមហ៊ុន Vingroup បានរៀបចំពិធីបើកការដ្ឋានសាងសង់រោងចក្រផលិតរថយន្តអគ្គិសនីនៅរដ្ឋ North Carolina សហរដ្ឋអាមេរិកកាលពីថ្ងៃទី២៨ កក្កដា ២០២៣។

គួរបញ្ជាក់ថា គម្រោងនេះមានទុនវិនិយោគសរុបចំនួន ២ពាន់លានដុល្លារ ក្នុងដំណាក់កាលទី១ ដែលនឹងត្រូវសាងសង់ឡើងលើផ្ទៃដីចំនួន ៧៣៣ហិកតា។

ព្រឹត្តិការណ៍នេះ ត្រូវបានគេកត់សម្គាល់ថា វាជាជំហានដ៏សំខាន់មួយនៅក្នុងយុទ្ធសាស្រ្តរបស់ Vingroup សម្រាប់ការពង្រីកទីផ្សារ និងការអភិវឌ្ឍន៍ម៉ាកយីហោរបស់ខ្លួននៅសហរដ្ឋអាមេរិក។

រោងចក្រផលិតរថយន្តរបស់ Vinfast គឺជារោងចក្រផលិតរថយន្តអគ្គិសនីដំបូងគេនៅរដ្ឋ North Carolina ហើយវាក៏ជាគម្រោងអភិវឌ្ឍន៍សេដ្ឋកិច្ចដ៏ធំបំផុតនៅក្នុងរដ្ឋនេះផងដែរ។

មួយវិញទៀត គម្រោងនេះត្រូវបានគេរំពឹងថា នឹងអាចបង្កើតបណ្តាញអ្នកផ្គត់ផ្គង់ និងការងាររាប់ពាន់សម្រាប់ប្រជាជនក្នុងតំបន់ ដែលស្របតាមទិសដៅរបស់រដ្ឋក្នុងការអភិវឌ្ឍន៍សេដ្ឋកិច្ចបៃតង និងបរិស្ថាន។

ឯកអគ្គរដ្ឋទូតវៀតណាមប្រចាំនៅសហរដ្ឋអាមេរិក លោក Nguyen Quoc Dzung បានចាត់ទុកថា ព្រឹត្តិការណ៍ដ៏វិសេសវិសាលនេះ មានសារសំខាន់ណាស់ ខណៈដែលវាស្របពេលនឹងខួប ១០ ឆ្នាំនៃទំនាក់ទំនងភាពជាដៃគូលើគ្រប់ជ្រុងជ្រោយរវាងវៀតណាម និងសហរដ្ឋអាមេរិក។ «វា​ជា​សក្ខីភាព​មួយ​ចំពោះ​ការ​រីកចម្រើន​នៃ​ភាព​ជា​ដៃគូ​ក្នុង​រយៈពេល​មួយ​ទសវត្សរ៍​កន្លង​មក​នេះ»។

ក្នុងដំណាក់កាលដំបូង រោងចក្រនឹងផលិតរថយន្តអគ្គិសនីម៉ូដែល VF7, VF8, និង VF9 ដោយប្រើសមាសធាតុដែលបានទិញពីអ្នកផ្គត់ផ្គង់នៅសហរដ្ឋអាមេរិក វៀតណាម និងប្រទេសមួយចំនួនក្នុងតំបន់។ ការពង្រីកផលិតកម្ម និងការបង្កើនទំហំនឹងត្រូវបានពិចារណាដោយផ្អែកលើតម្រូវការជាក់ស្តែងនៃដំណាក់កាលបន្ទាប់។

• Projects Development