សាលារាជធានីភ្នំពេញបង្ហាញពីសេវាមានភាពប្រសើរឡើង
ដើម្បីបង្កើនប្រសិទ្ធិភាព និងប្រតិបត្ដិការនៅថ្នាក់កណ្តាល សាលារាជធានីភ្នំពេញបានបើកសម្ពោធជាផ្លូវការនូវអគាររដ្ឋបាលថ្មីរបស់ខ្លួន ដោយមានចំណតរថយន្តក្រោមដីនៅដើមខែមេសានេះ។
សំណង់អាគារនេះមានកម្ពស់ ៥១ម៉ែត្រ ត្រូវជា ១២ជាន់ ដោយថវិកាសាងសង់របស់សាលារាជធានីភ្នំពេញផ្ទាល់ បានចាប់ផ្តើមសាងសង់កាលពីខែមិថុនា ឆ្នាំ២០១៥ ហើយបានបញ្ចប់នៅក្នុងខែមករា ឆ្នាំ២០១៦ ដោយមានទំហំសរុប ១១.៣១០ ម៉ែត្រការ៉េ។ អាគារនេះមានរួមបញ្ចូលគ្នានូវស្នាដៃស្ថាបត្យកម្មខ្មែរ និងស្ថាបត្យកម្មសម័យទំនើបដោយត្រូវបានរចនាឡើងដោយស្ថាបត្យករកម្ពុជា។
នៅជាន់ទី ១ នៃអាគារនេះគឺកន្លែងច្រកចេញចូលតែមួយ ហើយពីជាន់ទី ១ ដល់ជាន់ទី ៨ គឺជាការិយាល័យបំពេញការងារជាទូទៅរបស់សាលាសាលារាជធានី។ នៅជាន់ទី ៩ គឺជាកន្លែងឃ្លាំមើលកាមេរ៉ា CCTV ហើយជាន់ទី ១០ ជាកន្លែងទុកនូវគំរូផែនការមេរបស់ទីក្រុងឆ្នាំ ២០៣៥ ចំណែកជាន់ទី ១១ នេះត្រូវបានរចនាឡើងសម្រាប់ធ្វើជាសាលសន្និសីទ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានប្រាប់ភ្នំពេញប៉ុស្តិ៍កាលពីឆ្នាំមុនថា អគារថ្មីនេះនឹងជួយសម្រួលដល់មន្ត្រីសាលាក្រុងប្រមាន ៣៤០ នាក់ ហើយនៅពេលដែលមន្ត្រីរបស់ខណ្ឌ និងសង្កាត់ត្រូវបានរាប់បញ្ចូលទាំងអស់នោះ ចំនួននេះនឹងកើនដល់ ៨០០ នាក់។
ដោយសារតែបញ្ហាចំណតរថយន្តដែលតែងតែបន្តកើតមាន សាលារាជធានីភ្នំពេញបានបើកប្រើប្រាស់ចំណតរថយន្តក្រោមដីដែលមាន ៣ ជាន់ផងដែរ។ ចំណតនេះត្រូវបានបញ្ចប់ការសាងសង់នៅក្នុងខែកុម្ភៈ ឆ្នាំ ២០១៦ ដោយមានទំហំសរុប ៧.៧៨០ ម៉ែត្រការ៉េ និងអាចផ្ទុករថយន្តបានចំនួន ២៣៩ គ្រឿង។ ក្រៅពីសំណង់អគារ និងចំណតរថយន្តថ្មីនេះ សាលារាជធានីភ្នំពេញក៏បានធ្វើជួសជុលអគារដែលមានស្រាប់ និងបរិវេណសាលារាជធានីផងដែរ។
បើតាមអភិបាលរាជធានីភ្នំពេញ ឯកឧត្តម ប៉ា សុជាតិវង្ស ភ្នំពេញត្រូវបានបង្កើតឲ្យក្លាយជាទីក្រុងលើកដំបូងនៅក្នុងឆ្នាំ ១៣៧៥ នៅទួលវត្តភ្នំ។ បន្ទាប់មក ទីក្រុងនេះត្រូវបានធ្វើទំនើបកម្មក្នុងរជ្ជកាលព្រះបាទពញាយ៉ាតពីឆ្នាំ ១៤៣១ ទៅឆ្នាំ ១៤៣៤ ដោយការធ្វើឲ្យប្រសើរឡើងនូវប្រព័ន្ធធារាសាស្ត្រ និងហេដ្ឋារចនាសម្ព័ន្ធ។
២៤ ឆ្នាំបន្ទាប់ពីកម្ពុជាស្ថិតនៅក្រោមអាណាព្យាបាលបារាំងឆ្នាំ ១៨៨៧ រាជធានីត្រូវបានផ្លាស់ប្តូរពីឧដុង្គទៅកាន់តំបន់តូចមួយដែលពេលបច្ចុប្បន្ននេះស្ថិតក្នុងខណ្ឌដូនពេញ។ នៅពេលនោះហើយដែលតំបន់រដ្ឋបាលផ្លូវការ និងតំបន់ពាណិជ្ជកម្ម ត្រូវបានកសាងឡើងនៅជុំវិញវត្តភ្នំ។ គម្រោងហេដ្ឋារចនាសម្ព័ន្ធជាច្រើនរួមមាន ផ្លូវថ្នល់ ផ្លូវដែក កំពង់ផែ សាលារៀន មន្ទីរពេទ្យ អគារសាធារណៈ និងអគារកីឡា ត្រូវបានសាងសង់នៅលើផ្ទៃដីដ៏ធំក្នុងអំឡុងពេលនោះ។
នៅចន្លោះឆ្នាំ ១៩៥៣ និងឆ្នាំ ១៩៧០ រាជធានីភ្នំពេញបានឆ្លងកាត់ដំណាក់កាលមួយផ្សេងទៀតនៃទំនើបកម្មដឹកនាំដោយផែនការមេទីក្រុងមួយដែលរៀបចំឡើងដោយរដ្ឋាភិបាលសង្គមរាស្ត្រនិយមក្នុងសម័យនោះ។ ប៉ុន្តែសុបិន្តអាក្រក់នៃការបំផ្លិចបំផ្លាញមួយបានក្របដណ្តប់លើរាជធានីនេះពីឆ្នាំ ១៩៧០ ដល់ឆ្នាំ ១៩៧៥ មុនពេលដែលក្លាយជាទីក្រុងខ្មោចក្នុងអំឡុងរបបប្រល័យពូជសាសន៍ចន្លោះពីឆ្នាំ ១៩៧៥ និងឆ្នាំ ១៩៧៩។
លោកអភិបាលក៏បានមានប្រសាសន៍ផងដែរថា “សព្វថ្ងៃនេះ ភ្នំពេញលាតសន្ធឹងលើផ្ទៃដីជាង ៦៧៨ គីឡូម៉ែត្រការ៉េ ហើយត្រូវបានបែងចែកជា ១២ ខណ្ឌ ៩៦ សង្កាត់ និង ៩០៩ ភូមិ ។ ក្នុងនោះចំនួនប្រជាជនដែលនៅថេរក្នុងភ្នំពេញមានចំនួន ១,៦លាននាក់ និងពលករចំណាកស្រុក ០,៨ លានផ្សេងទៀត ហើយកំពុងកើនឡើងក្នុងអត្រា ៣,១៥ ភាគរយក្នុងមួយឆ្នាំ ព្រមទាំងមានដង់ស៊ីតេប្រជាជននៃ ២,២៨៧/គម២។” នៅក្នុងពិធីសម្ពោធអគារថ្មីនេះ សម្តេចនាយករដ្ឋមន្ត្រី ហ៊ុន សែន បានក្រើនរំលឹកដល់មន្ត្រីទាំងអស់ឲ្យពង្រឹងផលិតភាពការងាររបស់ខ្លួនជាមួយនិងអគារថ្មីស្រស់ស្អាតនេះ។
សម្តេចនាយករដ្ឋមន្ត្រីបានមានប្រសាសន៍ថា “អគារការិយាល័យថ្មីនៅទីនេះ គឺស្របទៅនឹងការរីកចំរើនកន្លងមកទល់ពេលនេះនៅក្នុងរាជធានីភ្នំពេញ ។ ប៉ុន្តែបញ្ហាធំជាងគេបំផុតសម្រាប់ពេលបន្ទាប់ គឺការមិនមែនមានការិយាល័យដែលទំនើបស្អាតនោះទេ ប៉ុន្តែគឺការធានាបាននូវប្រសិទ្ធិភាពការងារ។”
សម្តេចបានមានប្រសាសន៍សង្កត់ធ្ងន់ថា “បើទោះបីមានការិយាល័យធ្វើការងារល្អក៏ដោយ ខ្ញុំនៅតែអំពាវនាវឲ្យធ្វើការងារប្រកបដោយប្រសិទ្ធិភាព។ វាហាក់ដូចជាថានៅក្នុងទសវត្សឆ្នាំ ១៩៨០ ពេលដែលយើងស្ថិតនៅក្នុងស្ថានភាពលំបាកបំផុត ជាមួយកន្លែងការងារដែលមិនស្អាតល្អ ប៉ុន្តែប្រសិទ្ធភាពការងារគឺខ្ពស់ជាង។”
នៅក្នុងលិខិតដែលសាលារាជធានីភ្នំពេញផ្ញើទៅកាន់ក្រសួងមហាផ្ទៃ ដើម្បីស្នើសុំការអនុម័តយល់ព្រមកាលពីឆ្នាំមុន សាលារាជធានីភ្នំពេញស្នើសុំបង្កើតបន្ថែមនូវសង្កាត់ចំនួន ១១ ក្នុងខណ្ឌចំនួន ៥ ដើម្បីបង្កើនប្រសិទ្ធភាពការងាររបស់ខ្លួន។
- Video Advertisement -
English 
ខ្មែរ 
