អូស្ត្រាលីកំពុងគាំទ្រ និងជួយពង្រឹងការវិនិយោគលើអនាគតសន្តិសុខថាមពលរបស់កម្ពុជា

Proeksa Meas
13 ខែកក្កដា 2026
ព័ត៌មានសំណង់
180 មើល

តាមរយៈភាពជាដៃគូជាមួយ SchneiTec Jupiter មូលបត្របំណុលហេដ្ឋារចនាសម្ព័ន្ធតម្លៃ ១៥០លានដុល្លារ មានគោលបំណងពង្រីកសមត្ថភាពថាមពលពន្លឺព្រះអាទិត្យក្នុងស្រុក និងកាត់បន្ថយការពឹងផ្អែកលើការនាំចូលឥន្ធនៈ

រាជរដ្ឋាភិបាលប្រទេសអូស្រ្តាលី បានកំពុងបើកផ្លូវសម្រាប់ការវិនិយោគលើអនាគតថាមពលរបស់កម្ពុជា សំដៅឈានទៅកាត់បន្ថយការពឹងផ្អែកលើការនាំចូលប្រេងឥន្ធនៈនាពេលអនាគត។ នេះបើយោងតាមការចុះផ្សាយរបស់ស្ថានទូតអូស្រ្តាលីប្រចាំកម្ពុជា កាលថ្ងៃទី៣០ ខែមិថុនា ឆ្នាំ២០២៦។

ស្ថានទូតអូស្រ្តាលីបានបញ្ជាក់ថា ខណៈដែលការរំខានដល់ទីផ្សារថាមពលសកល និងខ្សែសង្វាក់ផ្គត់ផ្គង់កំពុងជះឥទ្ធិពលដល់វិស័យថាមពលរបស់កម្ពុជា អូស្ត្រាលីកំពុងបង្កើនកិច្ចខិតខំប្រឹងប្រែងក្នុងការចាប់ដៃគូដើម្បីពង្រឹងភាពធន់នៃវិស័យថាមពលក្នុងរយៈពេលវែង។

ស្ថានទូតបានបន្តថា អូស្ត្រាលីកំពុងគាំទ្រក្រុមហ៊ុន SchneiTec Jupiter ក្នុងការបោះផ្សាយសញ្ញាបណ្ណហេដ្ឋារចនាសម្ព័ន្ធ ដែលមានតម្លៃប្រមាណជា ១៥០លានដុល្លារអាម៉េរិក ដើម្បីអភិវឌ្ឍកសិដ្ឋានផលិតថាមពលពន្លឺព្រះអាទិត្យទំហំ ៣៥០មេហ្គាវ៉ាត់។ គម្រោងនេះនឹងជួយពង្រឹងសន្តិសុខថាមពលរបស់កម្ពុជា និងកាត់បន្ថយការពឹងផ្អែកលើការនាំចូលប្រេងឥន្ធនៈ។

ការគាំទ្រនេះ ធ្វើឡើងបន្តពីការដាក់ឱ្យប្រើប្រាស់នាពេលថ្មីៗនេះនូវប្រកាសស្តីពីសញ្ញាបណ្ណហេដ្ឋារចនាសម្ព័ន្ធរបស់កម្ពុជា ដែលត្រូវបានអនុម័តដោយក្រសួងសេដ្ឋកិច្ច និងហិរញ្ញវត្ថុ ក្រោមការគាំទ្រពីអូស្ត្រាលី។ យន្តការជាប្រវត្តិសាស្ត្រនេះ នឹងកៀរគរហិរញ្ញប្បទានក្នុងស្រុកយ៉ាងច្រើនសន្ធឹកសន្ធាប់ សម្រាប់ហេដ្ឋារចនាសម្ព័ន្ធសំខាន់ៗ។ នេះបើតាមការបញ្ជាក់បន្ថែមពីស្ថានទូតអូស្រ្តាលីប្រចាំកម្ពុជា។

ស្ថានទូតអូស្រ្តាលីប្រចាំកម្ពុជា បានបញ្ជាក់ទៀតថា កិច្ចខិតខំប្រឹងប្រែងរួមគ្នាទាំងនេះ គឺបានឆ្លុះបញ្ចាំងពីការប្តេជ្ញាចិត្តរបស់អូស្ត្រាលីចំពោះអនាគតថាមពលស្អាតរបស់កម្ពុជា ក្នុងការជំរុញកំណើនប្រកបដោយនិរន្តរភាព និងកសាងសេដ្ឋកិច្ចឱ្យកាន់តែមានភាពធន់៕ (អានបន្ថែម)