កម្ពុជា-ជប៉ុន ចុះកិច្ចសន្យាលើគម្រោងសាងសង់ស្ពានកោះខ្សាច់ទន្លា ក្នុងភូមិសាស្រ្តខេត្តកណ្តាល

Sommana Yan
13 ខែឧសភា 2026
ព័ត៌មានសំណង់
477 មើល

ក្រសួងសាធារណការ និងសម្ព័ន្ធក្រុមហ៊ុន CHODAI Co., LTD (JAPAN) បានសម្រេចចុះកិច្ចសន្យាផ្តល់សេវាប្រឹក្សាយោបល់លើគម្រោងសាងសង់ស្ពានកោះខ្សាច់ទន្លា ស្ថិតនៅស្រុកស្អាង ខេត្តកណ្តាល ក្រោមអធិបតីភាពឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន កាលថ្ងៃទី៨ ខែឧសភា ឆ្នាំ២០២៦។

ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ បានឱ្យដឹងថា គម្រោងសាងសង់ស្ពានកោះខ្សាច់ទន្លា នឹងសាងសង់ស្ពានឆ្លងកាត់ទន្លេបាសាក់ភ្ជាប់តំបន់កោះខ្សាច់ទន្លា ស្ថិតនៅក្នុងឃុំកោះខ្សាច់ទន្លា ស្រុកស្អាង ខេត្តកណ្តាល ទៅកាន់ផ្លូវជាតិលេខ២១ ដែលជាសរសៃឈាមសេដ្ឋកិច្ចដ៏សំខាន់ រួមចំណែកដល់ការលើកកម្ពស់ការធ្វើដំណើរប្រចាំថ្ងៃ និងការដឹកជញ្ជូនផ្សេងៗរបស់បងប្អូនប្រជាពលរដ្ឋ ព្រមទាំងជំរុញសកម្មភាពសេដ្ឋកិច្ច-សង្គម ឱ្យកាន់តែមានភាពសកម្មបន្ថែមទៀត។

គម្រោងសាងសង់ស្ពានកោះខ្សាច់ទន្លាមានប្រវែងប្រមាណ ២៨០ម៉ែត្រ និងសាងសង់ផ្លូវតភ្ជាប់ពី ក្បាលស្ពាន ប្រវែងប្រមាណ ២៧៦ម៉ែត្រ។ គម្រោងនេះមានសារៈសំខាន់ក្នុងការឆ្លងកាត់ទន្លេបាសាក់ ដើម្បីតភ្ជាប់កោះខ្សាច់ទន្លា ទៅកាន់ផ្លូវជាតិលេខ២១ សំដៅលើកកម្ពស់បណ្តាញដឹកជញ្ជូន និងភស្តុភារកម្មកសិកម្ម ព្រមទាំងជំរុញកំណើនសេដ្ឋកិច្ចប្រកបដោយចីរភាពរបស់កម្ពុជា។

គម្រោងសាងសង់ស្ពានកោះខ្សាច់ទន្លានេះដែរ ក៏នឹងតភ្ជាប់ បង្កើនជម្រើសនៃការប្រើប្រាស់ប្រភេទមធ្យោបាយដឹកជញ្ជូនបានគ្រប់រដូវកាល ទាំងរដូវប្រាំងនិងរដូវវស្សា ដែលជួយកាត់បន្ថយ ថ្លៃដឹកជញ្ជូន (ជាពិសេសការដឹកជញ្ជូនផលិតផលកសិកម្មទៅកាន់ទីផ្សារ) ធ្វើឱ្យប្រសើរឡើងនូវ កំណើនសេដ្ឋកិច្ចនិងការអភិវឌ្ឍ ដោយរួមចំណែកដល់ការអភិវឌ្ឍកោះខ្សាច់ទន្លានេះ ឱ្យក្លាយជា មជ្ឈមណ្ឌលកសិកម្ម និងផលិតផលិតផលកសិកម្ម, និងផ្តល់នូវមធ្យោបាយដឹកជញ្ជូនដ៏មាន សុវត្ថិភាព និងសម្រួលដល់ការធ្វើដំណើររបស់ប្រជាជនទៅនិងមក ពីកោះខ្សាច់ទន្លាទៅកាន់ទីក្រុង ភ្នំពេញ។នេះបើតាមការបញ្ជាក់បន្ថែមពីក្រសួងសាធារណការ និងដឹកជញ្ជូន៕