រដ្ឋចុះបញ្ជីផ្ទៃដីជាង ១ម៉ឺនហិកតាក្នុងខេត្តស្ទឹងត្រែង ជាតំបន់គ្រប់គ្រងអភិរក្សសត្វផ្សោតទន្លេមេគង្គ

Sommana Yan
19 ខែឧសភា 2026
ព័ត៌មានអចលនទ្រព្យ
130 មើល

ក្រសួងរៀបចំដែនដី នគរូបនីយកម្ម និងសំណង់ បានសម្រេចចុះបញ្ជីផ្ទៃដីទំហំ ១០ ៨៧៣,៣៥ ហិកតា ជាដីសម្រាប់តំបន់គ្រប់គ្រងសត្វផ្សោតទន្លេមេគង្គស្ថិតក្នុងទឹកដីខេត្តស្ទឹងត្រែង ដើម្បីឱ្យការអភិរក្សផ្សោតកាន់តែមានប្រសិទ្ធភាព។ នេះបើយោងតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ កាលទី១១ ខែឧសភា ឆ្នាំ២០២៦។

ក្រសួងបានបញ្ជាក់ជូនថា ការចុះបញ្ជីដីធ្លីសម្រាប់តំបន់គ្រប់គ្រងសត្វផ្សោតទន្លេមេគង្គ (តំបន់ស្នូលទី២) ក្នុងខេត្តស្ទឹងត្រែង សម្រេចជាស្ថាពរ គឺជាសមិទ្ធផលដ៏សំខាន់មួយទៀតក្នុងការការពារសម្បត្តិធម្មជាតិរបស់កម្ពុជា។ កិច្ចសហប្រតិបត្តិការយ៉ាងជិតស្និទ្ធរវាងអគ្គនាយកដ្ឋានជលផលនៃក្រសួងកសិកម្ម រដ្ឋបាលថ្នាក់ក្រោមជាតិ អាជ្ញាធរពាក់ព័ន្ធ អង្គការ WWF និងបងប្អូនឆ្មាំទន្លេ ក្នុងការការពារនិងការអភិរក្ស បានធ្វើឱ្យមានកំណើនចំនួនផ្សោតជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ហើយការចុះបញ្ជីនឹងធ្វើឱ្យការគ្រប់គ្រងតំបន់អភិរក្សកាន់តែមានប្រសិទ្ធភាព។

ជាមួយគ្នានេះ ក្រសួងកសិកម្ម ក៏បានថ្លែងអរគុណដល់ក្រសួងរៀបចំដែនដី ដែលបានផ្តល់កិច្ចសហការយ៉ាងសកម្មក្នុងការចុះបញ្ជីដីធ្លី និងចេញវិញ្ញាបនប័ត្រសម្គាល់ម្ចាស់កម្មសិទ្ធិជាស្ថាពរ។ ការរក្សាបាននូវទីជម្រកប្រកបដោយសុវត្ថិភាព គឺជាការធានាថាស្នាមញញឹមនៃទន្លេមេគង្គនឹងនៅបន្តវត្តមានសម្រាប់កូនចៅជំនាន់ក្រោយ។

សូមរំឭកដែរថា កាលពីឆ្នាំ ២០២៥កន្លងមក ក្រសួងដែនដីក៏បានចុះបញ្ជី តំបន់គ្រប់គ្រងនិងការពារសត្វផ្សោតទន្លេមេគង្គទំហំ ២១ ៩៦៦,៥១ ហិកតា ផងដែរ ស្ថិតក្នុងខេត្តក្រចេះ។ កម្ពុជាទទួលបានកូនសត្វផ្សោតទន្លេមេគង្គកើតថ្មីចំនួន ៦ក្បាល គិតត្រឹមដើមខែឧសភា ឆ្នាំ២០២៦ ក្នុងនោះកូនផ្សោតទី៦ ត្រូវបានប្រទះឃើញនៅអន្លង់ផ្សោតកាំពី ស្ថិតក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ កាលពីថ្ងៃទី២៧ ខែមេសា ឆ្នាំ២០២៦ ដែលធ្វើឱ្យចំនួនសត្វផ្សោតសរុបកើនដល់ ១១៨ ក្បាល៕