គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបនៅបន្ទាយមានជ័យជំហានទី២ ជិតបញ្ចប់១០០% ហើយ

• Proeksa Meas
• 30 ខែ​មេសា 2026
• ព័ត៌មានសំណង់
• 386 មើល

គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ ដែលស្ថិតក្នុងភូមិសាស្រ្តក្រុងសិរីសោភ័ណ ខេត្តបន្ទាយមានជ័យ គិតត្រឹមថ្ងៃទី២០ ខែមេសា ឆ្នាំ២០២៦ សម្រេចវឌ្ឍនភាពការងារ បាន៩៥%ហើយ។ នេះបើយោងតាមការប្រកាសរបស់ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន កាលថ្ងៃទី២១​ ខែមេសា ឆ្នាំ២០២៦។

ឯកឧត្តម ផន រឹម បានបន្តថា គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ គឺក្រោមឥណទានសម្បទានរបស់ធនាគារអភិវឌ្ឍន៍អាស៊ី(ADB)។ អនុគម្រោងកែលម្អគ្រប់គ្រងបរិស្ថានក្រុងជុំវិញបឹងទនេ្លសាប ជំហាន២ រួមមាន៖ ការសាងសង់ប្រព័ន្ធលូរំដោះទឹកកខ្វក់ ប្រវែង១១០,៩១គ.ម ប្រព័ន្ធលូទឹកភ្លៀង​ ៦,៨៨ គ.ម ព្រមទាំងស្ថាបនាស្ថានីយចម្រោះទឹកកខ្វក់ ដែលមានសមត្ថភាព ៣៥០០ម៉ែត្រគូប ក្នុងមួយថ្ងៃ។ ឯកឧត្តមថា គម្រោងនេះមានវឌ្ឍនភាពការងារ ៩៥% ហើយ គិតត្រឹមថ្ងៃទី២០ ខែមេសា ឆ្នាំ២០២៦ ដោយគម្រោងគ្រោងនឹងបញ្ចប់នៅបំណាច់​ខែមិថុនា ឆ្នាំ២០២៦​ខាងមុខ។

អ្នកនាំពាក្យខាងលើ ក៏បានបញ្ជាក់ថា រដ្ឋបាលក្រុងសិរីសោភ័ណ និងក្រុមការងារ ក៏បានកំពុងយកចិត្តទុកដាក់ខ្ពស់បំផុតក្នុងការជំរុញវឌ្ឍនភាពការងារនៅការដ្ឋាន ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋឱ្យបានឆាប់៕ (អានបន្ថែម)

• ADB
• environment
• city improvement
• Tonle Sap