ការសាងសង់ច្រាំងទន្លេបាសាក់ ក្នុងក្រុងសំពៅពូន ខេត្តកណ្តាល សម្រេចបានប្រមាណ ៦០% ហើយ

Proeksa Meas
9 ខែមិថុនា 2026
ព័ត៌មានសំណង់
400 មើល

វឌ្ឍនភាពការងារសាងសង់ច្រាំងទន្លេបាសាក់ ក្នុងក្រុងសំពៅពូន ខេត្តកណ្តាល គិតមកដល់ពេលនេះ សម្រេចបានប្រមាណ ៦០%ហើយ ខណៈអាជ្ញាធរក៏បានប្តេជ្ញាជំរុញការងារឱ្យចប់តាមផែនការកំណត់ផងដែរ។ ថ្លែងក្នុងឱកាសអញ្ជើញចុះពិនិត្យវឌ្ឍនភាពការងារសាងសង់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានឱ្យដឹងថា ច្រាំងទន្លេបាសាក់-ទន្លេហ៊ូវ គឺស្ថិតក្នុងភូមិសាស្ត្រសង្កាត់ព្រែកជ្រៃ ក្រុងសំពៅពូន ខេត្តកណ្តាល ហើយការងារសាងសង់ច្រាំងទន្លេបាសាក់នេះ គឺមានប្រវែង ៥០០ម៉ែត្រ។

ឯកឧត្តមបានបន្តថា ការងារសំខាន់ៗដែលសម្រេចបានរួមមាន៖ ១.ការងារបុកគ្រឹះ ២.រៀបបាវខ្សាច់ទប់ជើងក្រោមប្រើ Geotextile ៣.រៀបកញ្ច្រែងថ្ម ៤.ចាក់បេតុងធ្នឹមក្រវ៉ាត់ជើងក្រោម ៥.ធ្វើដីសម្រាប់ចាក់បេតុងជើងទេរ ៦.ធ្វើផ្លូវបេតុង ៧.ធ្វើបង្កាន់ដៃ និង ៨.ការចាក់ជើងទេរបេតុង។ គិតមកដល់ពេលនេះលទ្ធផលការងារសម្រេចបានប្រមាណ ៦០% បើតាមផែនការគម្រោងនេះនឹងបញ្ចប់នៅពេលខាងមុខឆាប់ៗនេះ។

សូមជម្រាបថា ក្រសួងធនធានទឹក បានចាប់ផ្តើមអនុវត្តគម្រោងការពារច្រាំងទន្លេបាសាក់ ប្រវែង ៥០០ម៉ែត្រនេះនៅថ្ងៃទី២៥ ខែឧសភា ឆ្នាំ២០២៥ គឺបន្ថែមបន្តពីច្រាំងទន្លេដែលបានសាងសង់រួចប្រវែង ១២០០ម៉ែត្រ ក្នុងសង្កាត់ព្រែកជ្រៃ ក្រុងសំពៅពូន ខេត្តកណ្តាល ដើម្បីការពារការបាក់ស្រុតច្រាំងទន្លេបាសាក់ ការពារទ្រព្យសម្បត្តិ និងអាយុជីវិតរបស់ប្រជាពលរដ្ឋដែលរស់នៅតាមដងទន្លេសាបាក់។ ដោយឡែក សម្រាប់ទំហំ និងប្រភពថវិកានៃគម្រោង មិនត្រូវបានប្រកាសជាសាធារណៈនៅឡើយ៕ (អានបន្ថែម)