កម្ពុជា-ចិនរួមគ្នាពង្រឹងសមត្ថភាពបច្ចេកវិទ្យារូបភាពផ្កាយរណបដើម្បីទំនើបកម្មវិស័យបរិស្ថាន

Proeksa Meas
24 ខែមីនា 2026
ព័ត៌មានសំណង់
596 មើល

អនុស្សរណៈនៃការយោគយល់គ្នាជាយុទ្ធសាស្ត្រមានគោលបំណងកសាងសុវត្ថិភាពអេកូឡូស៊ី និងអនាគតបៃតងតាមរយៈការគ្រប់គ្រងទិន្នន័យ និងការត្រួតពិនិត្យភាពជាក់លាក់កាន់តែប្រសើរឡើង

កម្ពុជា-ចិន ពង្រឹងកិច្ចសហប្រតិបត្តិការបច្ចេកទេសក្នុងវិស័យបរិស្ថានកម្ពុជា តាមរយៈការពង្រឹងការធ្វើទំនើបកម្មបច្ចេកវិទ្យារូបភាពផ្កាយរណបឱ្យកាន់តែប្រសើរ។ កិច្ចសហប្រតិបត្តិការនេះ ប្រព្រឹត្តទៅក្រោមអនុស្សរណៈនៃការយោគយល់គ្នា ដែលចុះហត្ថលេខាដោយឯកឧត្តម ខ្វៃ អាទិត្យា អនុរដ្ឋលខាធិការក្រសួងបរិស្ថាន និងលោក ឈីត ឌី អគ្គនាយករង នៃក្រុមហ៊ុនរដ្ឋចិន GUANGXI LAND AND RESOURCES PLANNING AND DESIGN GROUP CO., LTD កាលថ្ងៃទី១២ ខែមីនា ឆ្នាំ២០២៦។

នាឱកាសនោះ លោក ឈីត ឌី អគ្គនាយករង បានស្វាគមន៍ក្រសួងបរិស្ថានដែលផ្តល់ទំនុកចិត្តដល់ក្រុមហ៊ុន។ លោកសង្ឃឹមថា តាមរយៈកិច្ចសហប្រតិបត្តិការនេះ យើងនឹងចាប់ដៃគ្នាបង្កើតជាប្រវត្តិសាស្ត្រនៃប្រតិបត្តិការប្រកបដោយយុទ្ធសាស្រ្ត និងជាក់លាក់ ដើម្បីកសាងសុវត្ថិភាពអេកូឡូស៊ី និងអនាគតបៃតងជាមួយគ្នា។

ជាមួយគ្នានេះ ឯកឧត្តម ខ្វៃ អាទិត្យា បានលើកឡើងថា MoU នេះ បានរួមចំណែកដល់កិច្ចខិតខំប្រឹងប្រែងរបស់ក្រសួងបរិស្ថាន ក្នុងការដោះស្រាយបញ្ហាដ៏សំខាន់ គឺការប្រើប្រាស់បច្ចេកវិទ្យារូបភាពផ្កាយរណប និងការគ្រប់គ្រងប្រព័ន្ធទិន្នន័យរូបភាពផ្កាយរណប ដើម្បីធ្វើទំនើបកម្មវិស័យបរិស្ថានកម្ពុជា។

តាមរយៈ MoU នេះផងដែរ កម្ពុជា-ចិន នឹងសិក្សាអំពីតម្រូវការគោលនយោបាយរបស់ក្រសួង ជាមួយនឹងបទពិសោធន៍បច្ចេកទេសរបស់ក្រុមហ៊ុនក្នុងវិស័យបច្ចេកវិទ្យាប្រព័ន្ធផ្កាយរណប BeiDou Navigation Satellite System (BDS) រូបភាពផ្កាយរណបសាធារណៈរដ្ឋប្រជាមានិតចិន។ ភាគីទាំងពីររំពឹងថា MoUនេះ នឹងត្រូវបានប្រែក្លាយទៅជាវឌ្ឍនភាពជាក់ស្តែង ជាពិសេសការធ្វើទំនើបកម្មបច្ចេកវិទ្យារូបភាពផ្កាយរណប ដើម្បីធានាថាបច្ចេកវិទ្យាទាំងនេះត្រូវបានប្រើប្រាស់ប្រកបដោយប្រសិទ្ធភាព នឹងគាំទ្រដល់ការធ្វើទំនើបកម្មវិស័យបរិស្ថានកម្ពុជា៕