រោងចក្រកែច្នៃដំឡូងមីថ្មីមួយនៅកំពង់ស្ពឺ តម្លៃ២០លានដុល្លារ ចាប់ផ្តើមសាងសង់ជាផ្លូវការ

Proeksa Meas
6 ខែឧសភា 2026
ព័ត៌មានសំណង់
497 មើល

រោងចក្រផលិតម៉្សៅដំឡូងមី ដែលមានទីតាំងនៅក្នុងខេត្តកំពង់ស្ពឺ ចន្លោះគីឡម៉ែត្រ ៧៤-៧៥ តម្លៃ ២០លានដុល្លារ បានចាប់ផ្តើមបើកការដ្ឋានសាងសង់ជាផ្លូវការហើយ កាលព្រឹកថ្ងៃទី២៧ ខែមេសា ឆ្នាំ២០២៦។ នេះបើតាមការប្រកាសរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

រោងចក្រផលិតម៉្សៅដំឡូងមីថ្មីនេះ មានទីតាំងស្ថិតនៅក្នុងភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ ចន្លោះគីឡម៉ែត្រ៧៤-៧៥។ ក្រសួងបានបញ្ជាក់ទៀតថា រោងចក្រកែច្នៃដំឡូងមីថ្មីមួយ បានបើកការដ្ឋានសាងសង់នៅខេត្តកំពង់ស្ពឺ ដែលជាជំហានសំខាន់មួយក្នុងការរួមចំណែកបង្កើតតម្លៃបន្ថែម សម្រាប់វិស័យដំឡូងមី និងពង្រីកវិស័យកសិ-ឧស្សាហកម្មរបស់កម្ពុជា។

ក្រសួងឧស្សាហកម្ម បានឱ្យដឹងបន្ថែមថា រោងចក្រនេះត្រូវបានអភិវឌ្ឍដោយក្រុមហ៊ុន Guanshen Shengda Agriculture Industry Co., Ltd. ក្នុងទុនវិនិយោគសរុបប្រមាណ ២០ លានដុល្លារអាមេរិក ដោយរំពឹងថានឹងពង្រឹងសមត្ថភាពកែច្នៃក្នុងស្រុក គាំទ្រកសិករ និងជំរុញកំណើននៃការនាំចេញ។

លោក Yang youytong ប្រធានក្រុមហ៊ុន បានបង្ហាញក្តីរំពឹងថា គម្រោងនេះនឹងអាចបង្កើតចំណូលលក់ប្រចាំឆ្នាំប្រមាណ ៩០លានដុល្លារ ដោយផលិម្សៅដំឡូងមី ១០ម៉ឺនតោន ដំឡូងមីស្ងួត ១០ម៉ឺនតោន និងកាកដំឡូងមីប្រើសម្រាប់ផលិតចំណីសត្វប្រមាណ ៣ម៉ឺនតោន៕