វិស័យធំៗចំនួន៣ បានជួយជំរុញសេដ្ឋកិច្ចខេត្តតាកែវ និងបង្កើតការងារមូលដ្ឋានកាន់តែមានប្រសិទ្ធភាព

Sommana Yan
12 ខែឧសភា 2026
ព័ត៌មានសំណង់
315 មើល

វិស័យធំៗចំនួន៣ រួមមាន៖ វិស័យកសិកម្ម វិស័យឧស្សាហកម្ម និងសំណង់ និងវិស័យសេវាកម្ម បានជួយជំរុញសេដ្ឋកិច្ចខេត្តតាកែវ ដោយបានបង្កើតការងារមូលដ្ឋានកាន់តែមានប្រសិទ្ធភាព។ នេះបើយោងតាមប្រសាសន៍របស់ឯកឧត្តម វ៉ី សំណាង អភិបាលខេត្តតាកែវ នៅក្នុងពិធីជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានានៃខេត្តតាកែវ ក្រោមអធិបតីភាពសម្តេចតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា កាលថ្ងៃទី៧ ខែឧសភា ឆ្នាំ២០២៦។

យោងតាមរបាយការណ៍របស់ឯកឧត្តម វ៉ី សំណាង អភិបាលខេត្តតាកែវ បានឱ្យដឹងថា សមិទ្ធផលជាច្រើន ដែលខេត្តសម្រេចបាន គឺបានធ្វើឱ្យជីវភាពប្រជាពលរដ្ឋ បានល្អប្រសើរ។ សេដ្ឋកិច្ចខេត្តតាកែវបានមកពីវិស័យធំៗចំនួន៣ រួមមាន៖ វិស័យកសិកម្ម ៥៣% វិស័យឧស្សាហកម្ម និងសំណង់ ៣១% និងវិស័យសេវាកម្ម១៦%។ តាកែវជាខេត្តប្រកបដោយសក្ដានុពលកសិកម្ម តំបន់ទេសចរណ៍សំខាន់ៗ និងជាខេត្តដែលមានសក្តានុពលសេដ្ឋកិច្ចខ្ពស់។ បច្ចុប្បន្នខេត្តតាកែវ មានរោងចក្រ សហគ្រាសធំៗកំពុងធ្វើអាជីវកម្ម និងបន្តមកបណ្តាក់ទុនវិនិយោគជាបន្តបន្ទាប់ទៀត។

នាឱកាសនោះ សម្តេចតេជោ ហ៊ុន សែន បានវាយតម្លៃខ្ពស់ចំពោះភាគីពាក់ព័ន្ធ ខេត្តតាកែវទាំងអស់ ដែលបានខិតខំរួមសហការគ្នាអភិវឌ្ឍខេត្តមួយនេះឱ្យទទួលបាននូវការរីកចម្រើនជាបន្តបន្ទាប់។

សូមរំឭកថា នៅក្នុងឆ្នាំ ២០២៥ ខេត្តតាកែវ មានគម្រោងវិនិយោគបង្កើតរោងចក្រតាមរយៈការចុះបញ្ជីនៅ CDC មានចំនួន ៤៤ក្រុមហ៊ុន បើធៀបនឹងឆ្នាំ២០២៤ កើនឡើង១២០%។ ចំណែកនៅអនុគណៈកម្មាធិការវិនិយោគខេត្តតាកែវ មានចំនួន ៥១ក្រុមហ៊ុន កើនឡើង២៩២%៕ (អានបន្ថែម)